Un Proxecto de Amigos da Terra
O noso nome definenos. Somos unha asociación ecoloxista, integrada na rede de Friends of the Earth International, presente en 77 países con máis de un millón de socios e socias. A nosa misión é o fomento dun cambio local e global cara unha sociedade máis respetuosa co medio ambiente, xusta e solidaria.
Apostamos firmemente pola creación dunha nova cultura ambiental, polo que dende o ano 2002 desenvolvemos un proxecto vangardista orientado á formación deste novo modelo de sustentabilidade: As Corcerizas, na Serra de San Mamede no Macizo Central de Ourense, Galicia.
Dende o seu nacemento converteuse nun reto, un proxecto transformador no que Amigos da Terra fixo esta aposta por demostrar a viabilidade e importancia de poñer en práctica un proxecto educativo cun equipamento en total coherencia socioambiental, e impulsar un necesario cambio de paradigma mostrando alternativas reais dende a propia experiencia vivencial directa. Eficiencia enerxética e uso exclusivo de enerxías renovables, bioconstrución, biodepuración das augas, compostaxe, alimentación ecolóxica e local, xunto coa defensa e revalorización da contorna natural e rural, son os principais ingredientes que converteron en realidade esta iniciativa, que sigue evolucionando viva e dinamicamente como a propia natureza na que está asentada.
Neste contexto As Corcerizas é un equipamento recoñecido, considerado como referente para a posta en marcha doutras iniciativas. O seu modelo enerxético descentralizado, baseado na minimización de emisións de carbono, gañou o concurso Fondo de Sustentabilidade de Hostelling International, así como o premio CONAMA (Congreso Nacional de Medio Ambiente) a nivel estatal, un galardón honorífico que distingue as mellores iniciativas de eido local a favor da sostibilidade.
En Amigos da Terra continuamos defendendo alternativas que poñen freo aos máis graves problemas ambientais, xenerando reflexión e reacción social, para crear novas liñas estratéxicas, sinerxías e fortalecer o traballo en rede. Precisamos o teu apoio para continuar demostrando que dende a práctica e a acción podemos formar parte das propias solución!
Actívate, faite Amig@ da Terra!
Histograma
Evolución do proxecto As Corcerizas desde 1995 a 2015.