As Corcerizas localízase no ecosistema forestal da Serra de San Mamede, no sistema montañoso do Macizo Central de Ourense. Situado no suroeste da provincia, conta con 53.000 hectáreas que o conforman como o segundo espazo protexido máis extenso de Galicia, catalogado como Lugar de Importancia Comunitaria (L.I.C.) dentro da Rede Natura 2000, figuras de protección a nivel europeo. Constitúe un espazo de gran riqueza faunística cun total de 176 especies de vertebrados, destacando especies protexidas como a aguia real e o lagarto das silvas e especies seriamente ameazadas como a perdiz común. A variedade que atopamos en anfibios e reptís de montaña tamén é importante, existindo diferentes tipos de lagartos e píntegas, característicos da rexión. Entre os mamíferos, a lebre, o lobo, a marta, o cervo, o corzo ou os xabarís son mostra da gran biodiversidade.

Polo seu alto valor ecolóxico e rareza, resulta relevante o Bidueiral de Montederramo, declarado Zona de Especial Protección dos Valores Naturais (ZEPVN) e Lugar de Importancia Comunitaria (LIC ). Distínguese por ser unha das fragas de bidueiros situada máis ao sur de Galicia, pola altitude na que se atopa (entre 1600 e os 959 m), e polo seu estado de conservación. Ademais destaca polo resto de especies autóctonas coma acivros, cancereixos, arandos, carballos, fentos, liques e outros exemplares que mudan de cor segundo o paso das estacións.

Outro atractivo da Serra é o Río Arnoia, que nace nos cumios de San Mamede dende os cales pódese observar os restos da pegada do mar de auga doce que un día encheu de vida e dulcificou o clima da comarca da Limia, a Lagoa de Antela. É recoñecida coma unha das lagoas máis importantes da Península Ibérica, tanto pola súa extensión como pola súa riqueza, desecada a partir do ano 1956.

A ubicación de As Corcerizas é tamén privilexiada pola gran riqueza etnográfica que a rodea, debido á proximidade con varios pobos típicos da montaña galega e outros elementos patrimoniais singulares. O descenso pola montaña lévanos ata Rebordechao, pobo que conserva a riqueza arquitectónica das construcións populares tradicionais, como forxas, alvarizas, muíños de auga, fornos comunais ou palleiras, construídos cos recursos da zona. O Concello de Vilar de Barrio no que se sitúa conta con diversos lugares de interese e rutas turísticas pasando polos seus pobos, así como o camiño da Vía da Prata, unha alternativa á peregrinación a Santiago de Compostela.