Sendas empedradas, paisaxes encantadoras e enerxías alternativas, acompañáronnos nesta II Andaina reivindicativa.

Sábado
Un pequeño percorrido entre as ruelas e prados de Rebordechao, trasladounos ata unha vida pasada onde, con exemplar sabiduría e respecto, os veciños deste pobo serrano aproveitaban os recursos que lle ofrecía a natureza.
Acompañados polos propios poboadores e desfrutando coa súa simpatía coñecemos:

• O colmear comunal. Alí puidemos apreciar a diferencia entre os métodos e materiais artesanais e modernos.
• A forxa de Pepe. Ferro candente ao vivo quentado polo carbón fabricado por eles mesmos anos atrás.
• O muiño da abelaira, capaz de moer a día de hoxe.
• A taberna do Pepe, onde uns ricos pinchiños de chouriço nos esperaban á hora do xantar.

A incomparable beleza do estreito camiño entre carballos, castiñeiros e os imponentes cumios das serras, compensou o esforzo da subida pola cara sul de San Mamede.

Xa sabedes, sobre a clasificación da dificultade das rotas, falar con Santos

Logo de coñecer de perto a bioconstrución e o funcionamento con enerxías renovables do Centro de As Corcerizas, chegou o licor café, a queimada e a música das gaitas… e á mañá seguinte

Domingo
… subida ata o alto de San Mamede, 1619 m de altitude.

Baixamos pola cara norte da Serra e entre o manto de espesa de neve e un sol case primaveiral, fómonos adentrando no Bidueiral de Montederramo…

As verxas do cercado cinexético no interior do cal se atopa este espazo declarado de interese comunitario (LIC) dentro da Rede Natura 2000, foron atravesadas por cada un dos participantes, que con esta marcha pretendían denunciar e evidenciar a intolerante situación na que se atopa unha das fragas máis interesantes e singulares da provincia de Ourense, por mor dunha irracional xestión cinexética intensiva.

Pero esta situación xa está en vías de cambio:
Como resultado das recentes reunións mantidas polo Comité de Defensa do Monte Galego co Delegado de Medio Rural e Delegado de Medio Ambiente de Ourense, comunicouse a disposición da empresa a eliminar o valado.

Agradecemos a alta participación e bo ánimo dos asistentes e esperamos que na III Andaina polo Bidueiral de Montederramo nos reunamos para celebrar a declaración do Macizo Central Ourensán coma Parque Natural e o Bidueiral como Reserva Integral.

Contamos con vós!

Fotografías: Xurxo

A II Andaina pola Defensa do Bidueiral de Montederramo
foi organizada polo Comite de Defensa do Monte Galego

O convenio de colaboración entre Amigos da Terra e o INEGA permitirá unha gran mellora do actual sistema enerxético que abastece ao Centro de Educación Ambiental As Corcerizas, baseado exclusivamente en enerxías renovables.

O INEGA suministrará e levará a cabo a instalación dun novo aeroxenerador ademáis de xestionar o vello restituído, incrementando o aporte enerxético actual.

Ademáis implantarase un novo sistema de calefación automático para o quecemento das instalacións e da auga sanitaria na aula e no comedor do Centro, á vez que mellorará o rendemento do sistema xa existente no albergue.

Agora máis que nunca, “As Corcerizas” estase a convertir nun recurso innovador para a Educación Ambiental, aberto a todo o mundo que se queira achegar a este enclave natural da Serra de San Mamede.

Amigos da Terra ofrece a oportunidade de traballar como director/a no campo de traballo “Novas Tecnoloxías no Medio Rural e Educación para a Sostibilidade na Serra de San Mamede” que terá lugar este verán en As Corcerizas.

O Albergue e Centro de Educación Ambiental As Corcerizas xestionado pola asociación Amigos da Terra, demostra a viabilidade dunha vida sostible mediante experiencias con enerxías renovables, bioconstrución e o uso de sistemas alternativos de tratamento de residuos. A educación ambiental, a integración local e a cooperación, serán as pezas clave para acadar os obxectivos deste proxecto.

Esta proposta leva asociada a implantación dun sistema de depuración natural mediante plantas acuáticas (Filtro de Macrofitas Flotante), que polo seu carácter innovador e formativo, esperta moito interese, presentándose coma o complemento ideal no sistema de xestión integral sostible do Centro.

Descrición da oferta:

Título: Director/a de campo de traballo “Novas Tecnoloxías no Medio Rural e Educación para a Sostibilidade na Serra de San Mamede”.

Duración: 2 campos de traballo de 15 días durante o mes de agosto de 2006

Imprescindible:

Valorarase:

Prazas: 1

Data límite para a entrega de currículum: 26 de Marzal de 2006

Correo electrónico: info@amigosdaterra.net
Teléfono: 988 374 318

O interese polo coidado da natureza e algo tan importante como é a Educación Ambiental uniu neste día a dúas culturas como son Galega e Húngara na procura de novas visións para unha educación de calidade.

O grupo de traballadores, na súa viaxe por diferentes centros que consideran referentes ao longo do país, chegaron ata San Mamede para coñecer a realidade dun modo de vida máis sustentable e respectuoso co ambiente e os seus recursos. Coñeceron dun xeito tanxible cómo unha construcción sá e o feito de estar abastecidos exclusivamente de enerxías renovables dota ao Centro dunha autosuficiencia e singularidade que se converten nun recurso educativo en sí mesmo.

O intercambio de información e o contacto para futuras colaboracións son mostra do entusiasmo que compartimos moitos por acadar o urxente e necesario cambio da concienciación cidadá.

O CEIP Saco e Arce do Concello de Toén disfrutou dunha xornada educativa e de diversión na natureza no Centro de Educación Ambiental “As Corcerizas”. A través da participación dos rapaces e gracias ao interese mostrado por parte dos educadores, descubriron novas formas de obter enerxía dunha forma máis respectuosa co medio e dun xeito interactivo mediante obradoiros, o manexo dos elementos enerxéticos a través dun roteiro interpretativo polas instalacións, xogos educativos,…