Unha alimentación sustentable, ademais de ser saudable para nós mesmos/as, debe respectar o medio no que todos e todas convivimos en sociedade. En As Corcerizas as comidas son preparadas, na medida do posible, con alimentos procedentes da agricultura ecolóxica local e comercio xusto. Deste xeito, aparte de servir coma exemplo e demostración de viabilidade, resulta un apoio para o desenvolvemento das pequenas explotacións da zona. Unha vez máis, a experiencia vivida é a mellor ferramenta para sensibilizar e concienciar da necesidade de cambiar os nosos hábitos alimenticios para o ben da nosa saúde, o medio ambiente e a prosperidade do rural galego.

Recomendacións de Amigos da Terra para unha alimentación sustentable

Cando vaias á compra sé consciente do que estás mercando:

2014_02_05_02
2014_02_05_04 2014_02_05_03
2014_02_05_05 2014_02_05_01

  1. Se mercas produtos de agricultura ecolóxica (sen pesticidas, herbicidas, nin transxénicos) e, na medida do posible locais e de tempada, ademais de estar garantindo beneficios para a saúde, estarás favorecendo o desenvolvemento das pequenas explotacións da zona e a conservación do medio.

  2. Algúns alimentos como o café, cacao, azucre… non os poderás atopar de produción local, si non que proveñen doutros países, na súa maioría empobrecidos polos abusos das grandes multinacionais. A alternativa ante esta situación é que contactes cunha distribuidora de Comercio Xusto, onde se garanten uns criterios de xustiza social e de desenvolvemento sostible para as comunidades que cultivan os alimentos que precisamos.

  3. Hai certos produtos que debes Rexeitar, como os que teñen un exceso de embalaxes ou os que percorren miles de quilómetros para chegar ata as nosas mans. É fundamental Reflexionar e informarnos sobre o produto antes de mercalo.

  4. A medida que se vaian consumindo os produtos, lembra que moitos dos envases que quedan baleiros pódense Reutilizar sen ter que destruílos, aforrando así a enerxía que se destinaría a facelos de novo. Á hora de mercar escolle os produtos pensando no seu destino último: ao vidro podes darlle moitos máis usos que aos envases de plástico ou latas, que ademais consumen moita enerxía e auga na súa produción.

  5. Podes organizar a cociña para separar todos aqueles residuos que non poidas reutilizar, para que posteriormente se poidan Reciclar, reducindo a utilización de novas materias primas. Ademais, coa utilización dun pequeno compostador podes chegar a reciclar toda a materia orgánica xerada, reducindo o teu cubo do xenérico nun 50%.