Arquivos de Maio, 2012
Participa na xornada “O rural que queremos”!
Mai 31
Amigos da Terra participará este vindeiro sábado 2 de xuño na primeira xornada “O rural que queremos”, unha iniciativa da Comunidade de Montes do Salgueiral coa colaboración do Concello de Pontevedra.
O obxectivo da xornada é o de ofrecer un espazo de encontro, diálogo e exposición da diversidade de iniciativas privadas que están contribuíndo a activar e conservar os recursos específicos do rural.
Aportaremos a experiencia do traballo que se desenvolve en As Corcerizas en conxunto coa Comunidade de Montes de Arnuide, para a recuperación e conservación da Serra de San Mamede.
Consulta o programa da xornada e apúntate!
As Corcerizas no boletín do CENEAM
Mai 30
Durante o mes de maio, As Corcerizas ocupou un espazo de relevancia na Carpeta informativa do Centro Nacional de Educación Ambiental CENEAM, un boletín electrónico mensual que constitúe un completo e práctico ficheiro de recursos en temas ambientais. Podedes consultar a reportaxe sobre As Corcerizas na sección ¿Quién es quién?, un espazo que adican a colectivos, entidades e institucións que traballan en educación ambiental.
O CENEAM é un centro de referencia en Educación Ambiental que leva máis de 20 anos traballando para promover a responsabilidade da cidadanía en relación ao medio ambiente. Parabéns polo aniversario!
Vente de campamento con Amigos de la Tierra!
Mai 28
Este verán poderás apuntar aos/ás teus/túas nenos/as ao Campamento ecolóxico de Educación Ambiental organizado polo grupo de Amigos de la Tierra Comunidad de Madrid.
Combinaremos as alternativas que ofrece As Corcerizas coa experiencia da asociación en campamentos de educación ambiental, actividades de lecer e multiaventura. Unha oportunidade para a convivencia de rapaces/zas de distintos territorios do Estado español, e na montaña!
- DATAS: 2 a 11 de agosto
- IDADES: 8 a 16 anos
- PREZO: 287€ para socios/as; 331€ para non socios/as
Máis información e inscricións:
amigos@tierramadrid.org; 91 697 34 22 – 678 481 037
Formación, voluntariado e convivio en As Corcerizas
Mai 23
Esta fin de semana Amigos da Terra convidou a un grupo de catorce persoas a participar nunha xornada dobre en As Corcerizas, na que se incluiu formación na campaña Alimentos Kilométricos e accións de voluntariado.
Destacou a colaboración no desenvolvemento da carreira Desafío Solidario 2012, un evento deportivo na que parte dos cartos acadados se destinarán á reforestación da Serra de San Mamede, zona moi afectada polos lumes do pasado outono.
Inscríbete ao Curso de Carpintería en Bioconstrución
Mai 18
Os días 9 e 10 de xuño levaremos a cabo unha acción formativa na que se transmitirán coñecementos, criterios e recursos prácticos que nos introducirán no mundo da carpintería de bioconstrución; capacitándonos para construir estruturas lixeiras e aplicar tratamentos e acabados na madeira.
O curso está dirixido a autoconstrutores/as, estudantes e profesionais da construción e bioconstrución, arquitectura, urbanismo, enxeñeiría, xestión do territorio, etc.
Imparte a formación André Calvo, profesional da carpinteiría e a bioconstrución.
Biodepuración de augas. Xornada teórico-práctica
Mai 2
O vindeiro 26 de maio Amigos da Terra levará a cabo en As Corcerizas unha Xornada teórico práctica sobre Biodepuración de augas.
A través de persoal técnico especializado, se exporán as bases da Fitodepuración e se presentarán alternativas viables, como o Filtro de Macrofitas en Flotación e Microorganismos Efectivos, para a depuración de augas.
Un Xornada sen dúbida interesante para particulares, empresas e Administración pública.
Participa no curso práctico de Cociña ecolóxica e local (Completo)
Abr 16
Os días 5 e 6 de maio levaremos a cabo o curso práctico de cociña ecolóxica. Nesta II edición achegarémonos máis a unha alimentación local e de tempada, centrándonos en alternativas para combinar os alimentos e obter a enerxía que precisamos na estación de primavera.
Coñeceremos os impactos que provocan os alimentos que percorren miles de quilómetros mentres cociñamos alternativas e coñecemos novas recetas.
Contaremos coa colaboración da especialista en cociña natural Gloria Domecq.
O curso está dirixido a calquera persoa, asociación, cooperativa de consumo, empresa, etc., interesada na transición cara unha alimentación sana e sustentable.
Roteiros para a Xuventude. Educación ambiental e lecer
Abr 2
“Roteiros para a Xuventude” consiste nun programa de saídas de fin de semana que permite o contacto coa natureza ao mesmo tempo que combina o lecer, o deporte e mailo coñecemento do noso contorno cultural e ambiental.
As Corcerizas sitúase dentro do Macizo Central Ourensán, catalogado como Lugar de Importancia Comunitaria (L.I.C.) dentro da Rede Natura 2000. A súa localización en plena montaña, a 1.100m. de altura, constitúe un recurso ideal para a desconexión, relaxación e posta en acción de actividades de natureza e lecer.
En As Corcerizas – Serra de San Mamede están previstas as seguintes datas para os roteiros:
- Abril: 21-22
- Maio: 12-13 e 26-27
- Xuño: 9-10
Alimentos Quilométricos: novo programa escolar!
Feb 10
Os alimentos que comemos veñen cada vez de máis lonxe: hortalizas de Marrocos, garbanzos de México, viño de Chile.. Ademais, cada vez é maior a cantidade de alimentos que importamos, contribuindo ao abuso dos recursos naturais dos países do Sur e agravando o cambio climático pola gran cantidade de emisións de gases de efecto invernadero que supón.
Investiguemos como frear o cambio climático co que comemos cada día!
Convidámosvos a participar nas xornadas educativas que levaremos a cabo dende o mes de marzo ata xuño.
OS 3 PRIMEIROS CENTROS EN APUNTARSE DISFRUTARÁN DA XORNADA DE XEITO GRATUÍTO! coa financiación da Fundación Biodiversidad, a través do proxecto estatal do que forma parte este programa e que desenvolve Amigos de la Tierra en diferentes puntos do estado español.
Comentarios Recentes